ROXAS CITY – Hugot nga nagapamalabag ang Integrated Bar of the Philippines (IBP) Capiz Chapter sa plano sang Metro Roxas Water District ukon MRWD nga magsulod sa isa ka kontrata nga bulk water gikan sa 3rd party supplier nga gin-aprubahan man sang board of directors sang talatapan sadtong Setyembre 26, 2020.
Ini ang ginpahayag ni IBP-Capiz Chapter President Atty. Remia Fuentes-Bartolome sang maiterview sang Bombo Radyo.
Suno kay Bartolome nga wala ini nakahibalo kun ano ang madalom nga rason sang talatapan kun ngaa ginasakuan nila ini apisar nga may yara sang malain nga epekto ini indi lamang sa mga kunsomidor subongman sa MRWD.
Ginpahayag sini nga kuntani panumdomon man sang talatapan ang ila nga mangin desisyon nga makapaayo sa ila nga talatapan.
Mahimo man sila nga magpanumdom sang iban nga pamaagi agud nga indi maapektuhan kag indi mabutang sa alang-alang ang ila mga kunsomidor kun sa diin magatuga ini sang rate increase sa ila nga balayran sa tubig.
Dapat nga maplastar man nila sang maayo ang nagakaigo nga rason sang ila nga talatapan natuhoy sa nasambit nga plano.
Samtang, sa pihak sini nagpasalig si Bartolome nga sila ang magaserbi nga tingog sang mga pumuluyo agud nga pamatukan ang nasambit nga plano sang talatapan nga indi ka mapamaayo sa mga kunsomidor kag nagadugang lamang sang dugang nga kagastuhanan sa ila nga mga balayaran.
