Suno kay Conti, may kaugalingon nga pundo ang ICC para diri.
Ginapanindugan sini, ang ICC tuman ka estrikto sa kwalipikasyon bilang isa ka saksi, kag mas estrikto pa gid sa kwalipikasyon kon mabaton sa witness protection program sa diin madamo sang mga ginadumilian.
Ginasiling nga indi kaladlawan ang mangin witness sa ICC bangud indi sila makabig nga bakasyonista, bangud wala sila sang kahilwayan sa schedule kag madamo sang restrictions sa paghulag.
Indi man sila makabig nga mga freeloaders, bangud ang pagbayluhanay amo ang pagkadula sang palangabuhian, mga pamahog sa seguridad, kag sikolohikal nga trauma.
Ginahinyo ni Atty. Conti, indi pag-i-divert ang isyu sa mga pagpamatay nga ginsugo sang mga anay opisyal.
Kag dapat man tandaan nga indi tanan nga napatay mga adik sa droga bangud may mga biktima nga bataon, tigulang kag iban pa nga nagsal-an lang.
Dagdag pa sang abogado, kun luyag magkaso sa ICC ukon sa diin man nahanungod sa crimes against humanity ukon murder, pwede ini nga himuon, basta mangin handa sa trabaho, bangud indi bastante ang comments sa Facebook para mangin basehan sang sensetibo nga kaso.
