Nagpagwa sang pahayag ang International Criminal Court (ICC) angut sa report nga may yara sang arrest warrant batok kay Senador Ronald “Bato” Dela Rosa.
Gin-athag sang ICC nga wala pa sang public arrest warrant nga ginpaguwa may kaangtanan sa Pilipinas.
Nagpanugyan man ang ICC sa publiko nga magpamati lamang sa opisyal nga pahayag kag likawan ang pagpalapta sang unverified nga impormasyon gikan sa online.
Una na nga ginpahayag ni Interior Secretary Jonvic Remulla nga nagapreparar sila sang task force nga may 10,000 nga maga-aresto sa Senador sa tion nga mag-isyu sang arrest warrant halin sa ICC.
Apang aminado si Remulla nga wala pa siya sang nabaton nga kopya sang arrest warrant gikan sa ICC.
Matandaan nga si Dela Rosa ang nagserbe bilang hepe sang PNP sang panahon ni former President Rodrigo Duterte nga subong ginadalahig sa maduguon nga war-on-drugs nga ginpasaka sa ICC.
