Ginbasura sang Pre-Trial Chamber I sang International Criminal Court (ICC) ang apelar sang defense team ni Former President Rodrigo Duterte nga baliskaron ang desisyon nga nagasiling nga siya ang “fit” ukon may ikasarang nga magpartisipar sa pre-trial proceedings.
Sa desisyon nga ginpagwa kahapon nga adlaw, Pebrero 13, ginpahayag sang kamara nga ang argumento sang depensa, nga posible maglain ang ikaayong lawas sang anay Presidente sa tion sang hearing isa ka huring-huring kag espekulasyon.
Ginklaro man sang ICC nga ang ila nauna nga desisyon sang Enero 26, 2026 nahanungod sa iya ikasarang sa pag-atubang sa pre-trial proceedings indi pa isa ka pinal nga desisyon sang iya ikasarang sa pagtindog sa hearing.
Una diri, ginpanindugan sang kampo ni Duterte nga indi makatarunganon ang proseso kag ginpahayag ginbalewala ang “objective facts” sang nagalala nga memorya sang anay Presidente.
Dugang pa nga nagpaandam ang depensa nga posible maapektuhan ang bug-os nga proseso kun magpadayon ang confirmation of charges hearing samtang wala pa lubos nga na-exercise ni Duterte ang iya mga kinamatarong.
Samtang, kasunod sang desisyon sang ICC sa petisyon sang kampo ni Duterte, makita nga ini ang magahatag sang dalan agud nga mag-abante ang kaso kag magpadayon ang natalana nga confirmation of charges hearing nga magasugod sa Pebrero 23.
