Ginkumpirma na sang International Criminal Court (ICC) nga nakapagwa na gid man ini sang warrant of arrest batok kay Senator Ronald “Bato” Dela Rosa.
Si Dela Rosa nga nagpungko anay bilang Philippine National Police (PNP) chief ang ginkasuhan bilang indirect co-perpetrator sa kontrobersyal nga drug war ni former President Rodrigo Duterte.
Suno kay ICC spokesperson Oriane Maillet, confidential ang ila pag-isyu sang arrest warrant sadtong Nobyembre 6, 2025.
Ginpagwa ini sang Pre Trial Chamber 1. nga sila man ang judges nga nagpungko sa confirmation of charges batok kay former President Rodrigo Duterte.
Ginsambit man sang ICC nga kabahin si dela Rosa sang mga operasyon sa rehiyon sang Davao antes ini nangin national police chief.
Matapos ang iya termino sa PNP, nagserbe man siya bilang Director General sang Bureau of Corrections sang 2018.
Sa subong, nagapabilin siya sa kustodiya sang Senado kaupod ang iban nga kaalyado nga senador nga nagapakita sang suporta sa iya.
Padayon naman nga ginahulat ang sabat ni dela Rosa kag sang gobyerno angot sa arrest warrant nga ginpaguwa sang international tribunal.
