Ginpagwa na sang International Criminal Court (ICC) ang agenda para sa status conference sa kaso ni former President Rodrigo Duterte sa Mayo 27.
Suno sa international tribunal, nakatutok ini sa preparasyon sa hearing ni Duterte sa kaso nga crimes against humanity.
Lakip sa mga isyu nga paga-istoryahan amo ang ginaduso nga petsa para sa pagsugod sang trial, kadamuon sang mga testigo kag ebidensya, mga expert witnesses, witness protection measures, disclosure obligations kag posible nga dugang nga mga insidente nga mahimo ilakip sang prosecutors sa kaso.
Ang Trial Chamber nagtalana man sang iskedyul para sa pagbinagbinag sang agreed facts, interpretation kag translations, partisipasyon sang mga biktima kag mga mosyon nga kinahanglan nga resolbahon antes magsugod ang trial.
Igasapubliko naman ang una nga status conference para sa hearing ni Duterte, apisar nga suno sa mga judges, ang pila ka porsyon sini ang mahimo nga himuon nga pribado sa tion nga may mga sensitibo nga isyu nga ginapahayag may kaangtanan sa seguridad sang mga testigo.
