Nagpagwa sang update ang International Criminal Court (ICC) sa kondisyon ni former President Rodrigo Duterte samtang yara sa kustodiya sa The Hague, Netherlands.
Suno sa ICC Registry, ginakabig si Duterte nga isa ka “elderly detained person” nga yara sa mataas nga risgo nga pagkahulog, gani ginapaidalom siya sa padayon nga cell monitoring.
Gin-athag man sang ICC nga sa talagsa lang nga mga okasyon nga natumba si Duterte, gilayon man nga nagresponde ang mga custody staff agud buligan siya kag gilayon nga nagpanawagan sang medical evaluation.
Ginhatagan pagtamod man sang ICC nga wala sang narekord nga insidente sang pagkahulog sa nagligad nga 30 ka adlaw.
Dugang pa sang ICC nga ginhimo na ang kinahanglanon nga adjustments sa iya selda kag kagamitan agud masiguro ang kaluwasan kag katawhay sang anay presidente.
Apang, ang mga detalye sang iya mga malala nga balatian wala ginpaambit bangod sang medical confidentiality.
Nahibaluan nga nagapangatubang sang kaso nga crimes against humanity si Duterte may kaangtanan sa war on drugs kag sa ginaalegar Davao Death Squad.
Ginasiguro man nga makahatag sang update ang ICC agud ipakita nga padayon nila nga ginamonitor ang ikaayong lawas kag safety sang anay presidente samtang padayon pa ang iya pagpangatubang sa kaso.
