Gintugutan sang International Criminal Court (ICC) ang pangabay sang kampo ni anay Presidente Rodrigo Duterte nga ipauntat anay ang desisyon sang hukmanan may kaangtanan sa iya request nga temporaryo nga pagpagwa, tubtob matapos makolekta sang iya mga abogado ang tanan nga kinahanglanon nga dokumento kag impormasyon bilang suporta sa kaso.
Sa ginpagwa nga majority decision sang Pre-Trial Chamber I, ginpalawig ang paghimo sang desisyon sa pangabay nga interim release tubtob nga may ihatag nga dugang nga aksyon ang kampo sang depensa, ukon kun isipan sang Chamber nga husto na ang panahon para magdesisyon.
Suno sa desisyon, wala nag-ugyon si Judge María del Socorro Flores Liera sa desisyon nga ginkasugtan nanday presiding Judge Julia Antoanella Motoc kag Judge Reine Adélaïde Sophie Alapini-Gansou.
Ginpahayag man sang ICC nga “ang proseso sang temporaryo nga pagpagwa ang sandig sa Article 60(2) sang Rome Statute nga ginapahanugutan lamang sa ‘persona nga ginpasakaan sang warrant of arrest,’ nga may katungdanan nga magpasaka ukon indi magpasaka sang request bisan san-o antes ang pinal nga pagtililipon sang korte.”
Ginklaro pa sang tribunal nga “agud masiguro nga ang desisyon sa interim release request may husto nga basehan, ginakabig sang Majority nga angay lang nga ipauntat anay ang pagpagwa sang desisyon tubtob nga may dugang nga aksyon nga himuon ang depensa, ukon kun isipon sang Chamber nga husto na ang panahon para maghatag sang desisyon.”
Suno sa 16-ka-panid nga dokumento, may pungsod nga nagsugot nga batunon si Duterte, nga may ginapangatubang nga kaso sang “crimes against humanity” bangud sa madugay nga kampanya kontra droga nga ginlunsar niya samtang siya pa ang mayor sang Davao City kag presidente sang Pilipinas.
Ginpanindugan sang depensa nga wala sang basehan nga ipabilin pa si Duterte sa pre-trial detention suno sa Article 58(1)(b) sang Rome Statute. — rason nga ginpangayo sang ila abogado nga si Atty. Nicholas Kaufman, nga pagaguwaon gilayon ang anay Presidente gikan sa kustodiya sang ICC.
