May yara ginasundan nga proseso ang International Criminal Court sa pag-review sang request para sa interim release.
Ini ang kasunod sang pagpasa naman sang bag-o nga medical evidence sang kampo ni anay President Rodrigo Duterte sa International Criminal Court bilang kabahin sang request nga interim release.
Sa interview sang Bombo Radyo kay Atty. Gilbert Andres, Accredited lawyer sang International Criminal Court, iya ginpahayag nga sa idalom sang Rule 118 sang ICC Rules of Procedure and Evidence, i-review sang korte ang detention sang isa ka suspek kada 120 ka adlaw, lakip na ang bag-o nga impormasyon kaangay sang medical evidence.
Suno kay Atty. Andres, kun sa ikaayong lawas, ang ICC may yara sang ginahatag nga full medical care sa detainees sa diin tanan nga kinahanglanon medikal sang suspek ang ginasabat sang korte.
Samtang ang flight risk kag iban nga dangers ang makabig nga legal issues sa diin ginadesisyonan ini sang Pre-Trial Chamber kag indi sang mga doctor.
Pahayag sang abogado, ginalantaw sang mga judge kun may kapasidad ang suspek nga magpalagyo sa tion nga mapahanugotan ang interim release, ang pagpasilabot sini sa imbestigasyon ukon paghimo pa gid sang kaangay nga mga krimen.
Sa kaso ni Duterte, ginpanindugan sang defense team sini nga may yara siya sang “impaired executive functioning” apang suno kay Atty. Andres, indi maga-rely ang ICC sa claim sang kampo sang anay presidente.
Sa baylo, ang Pre-Trial Chamber ang magalantaw sang reports gikan sa independent panel nga ginabug-osan sang tatlo ka mga medical experts kag magabase ang mga judge sa sini nga reports agud madisisyonan kun makasarang pa si Duterte nga magpartisipar sa trial.
