Magapatigayon sang imbestigasyon ang International Criminal Court (ICC) sa manggad ni anay Presidente Rodrigo Duterte lakip na ang iya assets kag financial resources agud mahibaluan kun kwalipikado ini sa legal aid nga ginatanyag sang korte suno kay ICC spokesperson Fadi El Abdallah.
Gin-athag sang opisyal sang ICC nga ang mga ICC judges lamang ang makadeklarar kun indi masarangan sang anay Presidente ang balayran sang iya mga legal counsel agud maka-avail ini sang legal aid program sang international tribunal.
Una diri, gin-indikar ni Vice President Sara Duterte ang posibilidad nga mag-apply ang ila pamilya sa legal aid program sang ICC agud mabayaran ang legal fees sang mga abogado sang ila amay nga mahimo maglab-ot sa minilyon ka pesos.
Samtang, sa tunga sang mga report nga natalana na nga magpaguwa sang freeze order ang ICC sa mga assets sang anay Presidente, gin-ako sang ICC spokesperson nga mahimo ini matabo sa anuman nga oras.
