Nagmando ang International Criminal Court (ICC) nga magtukod sang 3-person panel nga maga-determinar sa medikal nga kondisyon ni anay Presidente Rodrigo Duterte samtang yara ini sa The Hague, Netherlands.
Sa interview sang Bombo Radyo kay Atty. Gilbert Andres, Accredited Lawyer of the International Criminal Court, iya ginpahayag nga katuyuan sang sini nga lihok amo agud ang pagmonitor sa ikaayong-lawas sang anay Presidente agud mapatigayon na ang masunod nga tikang sa kaso sini.
Suno kay Atty. Andres, ang amo nga panel ang ginakalakipan sang isa ka forensic psychiatrist, isa ka neuropsychologist, kag isa ka dietric behavioral neurologist.
Pahayag nya, sa pihak sang sini nga mga medical assistance, magapabilin sa gihapon ang desisyon sa Pre-trial Chamber may kaangtanan sa ‘fit to stand the trial’ sang anay Presidente.
Ginsiling pa sa ini nga kun mapatud-an nga medically unfit si Duterte, mahimo nga ma-delay ukon temporaryo nga ipaiway sang mga hearing sandig sa mga patakaran sang ICC natuhoy sa ‘trial deferment.’
Samtang, ginaluman naman nila sa ila nga bahin nga mga biktima sang war on drugs sang anay Presidente nga subong gid nga tuig mapatigayon ang confirmation of charges.
Dugang pa sang natungdan, sa pihak sang amo nga kondisyon ni Duterte, magapatigayon sa gihapon ang imbestigasyon kag may posibilidad nga madayon na ang amo nga hearing.
Interviewed by Bombo Sunnie Mae Constantino Batencila
