Ginpatigayon sang International Criminal Court (ICC) ang ikaduha nga status conference para sa kaso nga crimes against humanity batuk kay former President Rodrigo Duterte bangud sa ginaalegar extrajudicial killings sa kampanya sang iya administrasyon batok sa iligal nga droga.
Wala nakatambong si Duterte sa status conference matapos ginpasugtan sang ICC Trial Chamber III ang iya legal team nga magrepresentar sa iya sa hearing.
Gin-excuse naman ni Presiding Judge Joanna Korner ang indi pagtambong ni Duterte, apang ginhatagan sini sang importansya nga pagalauman ang iya presenya sa mga masunod nga hugnat sang status conference.
Bilang sabat, ginpahayag sang Defense counsel ni Duterte nga si Atty. Peter Haynes nga nakahibalo ang anay president sa importansya sang iya pagtambong kag nahangpan niya nga kinahanglan niya nga mag-atubang sa korte.
Sa status conference, ginpaandaman ni Presiding Judge Joanna Korner si Atty Peter Haynes nahanungod sa iya mga interview sa media.
Suno kay Korner, ang paghatag sang pahayag sa media ang wala ginasakop sang iya papel bilang abogado sa mga hearing sa korte.
Padayon man nga gin-istoryahan sang korte ang iban pa nga procedural matters samtang nagapadayon ang preparasyon para sa masunod nga hugnat sang kaso.
Bisan pa nga mahimo nga may pagbag-o sa schedule pagkatapos sang conference, ang masunod sini nga petsa ang natalana sa Hulyo 14, 2026.
Samtang, naka-schedule naman ang pormal nga trial sang ICC Trial Chamber III sa kaso sa Nobyembre 30, 2026.
Ginhatagan man importansya ni International Criminal Court (ICC) Trial Chamber III Presiding Judge Joanna Korner nga dapat husto kag patas ang mangin reporting may kaangtanan sa kaso ni former president Rodrigo Duterte.
Suno sa iya, ini man bangud nakakuha sang international attention ang kaso sang anay presidente sang Pilipinas.
Ginpahanumdom man ni Korner ang tanan nga mga abogado nga likawan ang paghimo sang indi makatarungan nga mga komento angot sa kaso.
Pahayag pa niya, ang trial ang wala ginapatigayon base sa opinion sang publiko kundi sandig sa proseso sang Korte.
