Ginkumpirma ni Atty. Kristina Conti, assistant to counsel sa International Criminal Court (ICC), nga natukod na ang Trial Chamber III agud mag-uyat sang kaso ni Former President Rodrigo Duterte may kaangtanan sa war on drugs.
Suno kay Conti, nag-appoint ang ICC sang tatlo ka mga judges sanday Judge Joanna Korner, Judge Keebong Paek, kag Judge Nicolas Guillou, agud magpanguna sa kaso.
Dugang pa niya, ang masunod nga mga tikang tanan administratibo kag nagakinahanglan sang koordinasyon sa tunga sang prosekusyon, depensa, kag legal teams sang mga biktima.
Posible man nga maghiwat sang status hearing sa pribado nga sesyon sa masunod nga mga inadlaw.
Matandaan nga ginsuguran sang ICC ang imbestigasyon sa Pilipinas matapos ang report nga linibo ang napatay sa idalum sang anti-drug campaign ni Duterte humalin 2016 tubtub 2022.
