Ginreport sang International Criminal Court (ICC) nga nakabaton na ini sang 303 ka mga aplikasyon para sa partisipasyon sang biktima sa kaso batok kay anay Presidente Rodrigo Duterte bangud sa kakulang sang impormasyon sang publiko sa mga panumbungon.
Suno sa Registry, wala pa napaguwa ang Document Containing the Charges (DCC), gani limitado ang pagbulig sang mga victim support groups. Wala pa sa lima ka porsyento sang mga aplikasyon ang may kaangtanan sa 78 ka mga insidente sang pagpatay kag pagtuyo sa pagpatay nga ginasakop sang kaso.
Ang Office of Public Counsel for Victims nagpangabay nga ibasura ang mosyon sang depensa nga nagapangayo sang detalye sang pila ka mga biktima, bangud mahimo ini makabutang sa katalagman sang ila seguridad.
Matandaan nga si Duterte ang ginturn-over sa ICC sang Marso 12 kag nagapangatubang sang kaso nga murder may kaangtanan sa iya drug war.
