Ginmanduan sang Pre-Trial Chamber I sang International Criminal Court (ICC) ang prosecution kag ang defense team ni anay pangulong Rodrigo Duterte nga ihanda ang mga ebidensiya sa masunod nga bulan.
Sa mandu nakasaad nga dapat ang duha ka kampo ihanda na ang anuman nga sahi sang ebidensiya nga plano sini nga ipresentar.
Sa palaabuton nga Abril 4, 2025 ginapasumiter ang information sang mga ginpasa nga ebidensiya, kun pila ang mga witness kag ang mga panaysayon nila para sa bahin sang prosecutors.
Samtang sa kampo naman ni anay Pangulong Duterte may ara sila sang tubtob Abril 11 agud isumiter ang ila nga obserbasyon sa information nga isumiter sang prosecution.
Pagasabton man nila kun magprepresentar sang ebidensiya ukon magtawag sang ila kaugalingon nga witness sa pagahiwaton nga confirmation hearing sa bulan sang Setyembre.
Nahanungod naman sa partisipasyon sang mga biktima, ginhatagan sang ICC ang Registry sang tubtob Abril 2, 2025 nga mag-file sang obserbasyon nga may kahilabtanan sa aplikasyon sang mga biktima sa ila nga pagpartisipar.
Kalakip na diri ang admission proceedings, proof of identity documents kag legal representation sa karon nga proceedings.
Matanadaan nga base sa police records may 6,000 ka tawo ang napatay sa drug war apang base sa human rights groups, naglab-ot sa 30,000 ang napatay kalakip ang vigilante killings.
Una na nga ginpahayag ni anay Pangulong Duterte nga iya ginaako ang tanan nga mga kaso nga ginabato sa iya samtang ginsiling sang abogado sini nga si Nicolas Kaufman nga iligal ang pag-aresto sa anay pangulo.
