Naghingyo ang International Criminal Court (ICC) prosecution nga batunon bilang ebidensya ang nauna na nga narekord nga testimonya sang lima ka testigo sa kaso nga crimes against humanity batuk kay former President Rodrigo Duterte may kaangtanan sa maduguon nga kampanya kontra droga.
Base sa dokumento nga gin-file, naghingyo si ICC Acting Prosecutor Mame Mandiaye Niang nga tugutan ang Trial Chamber III nga magsumiter sang mga transcript kag may kaangtanan nga mga materyales gikan sa mga testigo nga ginkilala bilang P-1087, P-1151, P-1158, P-1161 kag P-1204.
Suno kay Niang, ang pagbaton sang nauna nga mga testimonya ang makabulig agud mapadasig ang trial kag mabuhinan ang oras nga gina-usik sa direkta examination sa mga testigo.
Ginpahayag man sang prosekusyon nga importante kag masaligan ang mga testimonya kag makabulig ini sa pagpamatuod sang mga alegasyon batok sa anay presidente.
Una na nga nagdesisyon ang ICC Trial Chamber III nga kwalipikado ini nga mag-atubang sa iya trial kag makasarang sa epektibo nga pag-exercise sang iya kinamatarong bilang isa ka akusado.
Natalana naman nga magasugod ang trial sang anay presidente sa Nobyembre 30.
