Plano sang International Criminal Court prosecution nga magpresentar sang lima ka testigo sa trial kay former President Rodrigo Duterte.
Suno kay Senior Trial Lawyer Julian Nicholls, ginalauman nga maga-atubang ang mga witnesses nga may code number 1302, 1100, 1400, 1263 kag 0009, magluwas lang kun may yara sang wala ginapaabot nga mga circumstances.
Dugang pa ni Nicholls nga gin-usisa sang mga analyst ang linibo ka mga dokumento nahanungod sa mga kamatayon nga resulta sang mga operasyon sang pulis kag iban pa nga mga kaso nga may kaangtanan sa war on drugs campaign.
Matandaan nga base sa pag-analisar sang ICC, 3,422 ka mga napatay ang narekord sa anti-illegal drug operations sa tunga-tunga sang Hulyo 2016 kag Nobyembre 2017.
Samtang, ginpanindugan ni defense lead counsel Peter Haynes nga kinahanglan pa nga repasuhon sang mga abogado ang mga dokumento.
Ginkwestyon man niya ang ginaalegar paggamit sanga artificial intelligence.
Apang, ginpanginwala naman ni Nicholls ang amo nga pahayag kag nag-insister nga ang mga dokumento gin-usisa sang mga analyst kag pila ka mga abogado.
