Ginalantaw sang Office of the Prosecutor sang International Criminal Court nga ang nangin tikang kag statements ni anay Presidente Rodrigo Duterte, iya pamilya kag supporters ang pila sa mga rason kun ngaa indi dapat pag i-grant ang ginahingyo sini nga interim release.
Suno kay ICC Deputy Prosecutor Mame Mandiaye Niang, ang pagpabilin ni Duterte sa ICC ang importante agud masiguro nga makapakita siya sa trial bangud sa nangin statement sang anay presidente nga wala sini ginabaton ang legitimacy sang legal proceedings batuk sa iya.
Ginsaad man sang Prosecutor ang nangin statement ni Duterte batuk sa ICC, amo man ang petition nga gin-file sini sa Korte Suprema batuk sa kooperasyon sang gobyerno sang Pilipinas sa International Criminal Court.
Pahayag sang prosecution, ang counsel kag pamilya ni Duterte ang nagasiling nga gin-kidnap ini kag nagapanawagan nga ibalik ang anay presidente sa Pilipinas.
“A victim of a kidnapping is unlikely to return to the custody of the kidnapper if allowed to escape. Mr. Duterte, his family, vocal supporters, and counsel all consider him a victim of kidnapping/abduction,” nasaad sa prosecution.
Samtang, suno sa prosecution, ang mga kaalyado kag myembro sang pamilya Duterte ang nagapabilin nga may gahom ilabi na si Vice President Sara Duterte nga anak sini kag nagasiling nga ang pagdakop sa iya amay ang makabig nga illegitimate.
Ang pag-release kay Former President Duterte pahayag niya ang magahatag sang risgo sa padayon nga imbestigasyon bangud posible mahatagan sang oportunidad nga pahugon ang mga testigo bangud daw kaangay nga maprotektahan ini sa gihapon sang gahom nga may yara ang iya mga kaalyado kag pamilya nga yara sa pulitika.
Nagapati ang prosecution nga may yara sang greater access si Duterte sa iya mga associates. Ginalantaw sang prosecution ang posibilidqd nga si Duterte kag ang iya associates ang nakapasilabot sa mga imbestigasyon lakip na sa mga ginaalegar extrajudicial killings sa Davao City sang 2009 , amo man sa Senate inquiries sa drug war sang 2016 kag 2017.
Nasaad man sa prosecution ang pagkapreso ni anay Senator Leila De Lima, ang kilala nga kritiko ni Dutere kag ang mga pagpamahog sang anay presidente batuk sa mga indibidwal nga indi pabor sa iya drug war.
