Isa ka tumalagsahon nga insidente ang natabo sa isa ka apartment sa Cordova, Cebu matapos nga mangin “friendly” ang ataman nga ido sa isa ka aramado nga kawatan nga nagpangawat sa ila nga balay.
Base sa kuha sang Closed-Circuit Television (CCTV), makit-an sa diri nga nakasulod ang suspek sa balay sa pag-agi sini sa beranda sa ikaduha nga panalgan. May dala ini nga armas-luthang kag gilayon nga gintayaan ang Misis nga yara sa sulod isa ka kwarto samtang ginapangayuan sang kwarta.
Sa tunga sang tensyon, nanotisyaran sang pamilya ang hulag sang ila nga ido — imbes nga kagton ukon lahayon ang kawatan, kaangay nga nakigdugsing pa ini kag nagpakita sang paghugop, nga kaangay kilala sini ang amo nga makawat.
Suno kay “Tin,” bata sang amo nga Misis, nagpabilin nga kalmado ang iya nga Iloy kag mahimat nga ginkontrol ang sitwasyon agud indi madalasa ang mga bata nga yara sa pihak nga kwarto. Ginkuha sang iya nga Iloy ang butangan sang alahas kag kwarta, antes nga naguwa sa beranda kun sa diin ginpanghaboy niya ang mga ini kag nagpangayo sang tabang sa ila nga mga kaingod.
Madasig nga nakapalagyo ang suspek kag nakuha ang mga alahas kag kwarta.
Nagapadayon sa subong ang imbestigasyon sang mga otoridad agud matumod ang amo nga kawwatan nga may tabon pa sa iya nga nawong.
Apisar nga tuman ang kakulba sang pamilya, nagapasalamat sila nga wala sang may nasakitan sa amo nga insidente, samtang, palamangkutanon sa gihapon sa ila kun ngaman nga nagsubong ang hulag sang ila nga ido, nga imbes kuntani nga magpahadlok, nakigdugsing pa ini sa amo nga kawatan.
