Subong nga adlaw, Agosto 21, ginakomemorar ang ika-43 nga anibersaryo sang kamatayon ni former Senador Benigno “Ninoy” Aquino Jr., ukon “Ninoy Aquino Day” nga ginluthang kag ginpatay sang 1983 sa anay Manila International Airport sa iya pagbalik sa Pilipinas halin sa Estados Unidos sang Amerika.
Antes siya magbalik, si Aquino nagpuyo sa Amerika sa sulod sang pila ka tuig kasunod sang iya pagkapreso sa idalom sang administrasyon ni anay President Ferdinand Marcos Sr.; didto, padayon siya nga nagapanawaga para sa demokrasya kag reporma sa gobyerno.
Sang Agosto 21, 1983, sakay sa eroplano halin sa Estados Unidos, nagbalik si Aquino sa Pilipinas sa pihak sang mga pamahog sa iya seguridad, apang wala madugay pagkatapos nga makapanaog sa eroplano ginluthang siya sa airport kag gilayon nga napatay.
Ang iya kamatayon nagtuga sang lapnagon nga pagpakamalaut gikan sa publiko kag dugang nga nagpabaskog sang kahublagan sang oposisyon batok sa administrasyon ni Marcos Sr., samtang nagdugang man ang mga aksyon kag panawagan para sa pagbag-o sa gobyerno.
Pagligad sang tatlo ka tuig, nangin importante nga bahin sang mga hitabo nga nagdul-ong sa People Power Revolution sang Pebrero 1986 ang pagdamo sang malapnagon nga hublag-protesta sang mga Pilipino, nga nagresulta sa pagtapos sang masobra duha ka dekada nga pagpamuno ni Marcos Sr.
Si Ninoy Aquino padayon nga ginadumdom bilang simbolo sang paghimakas para sa demokrasya, kahilwayan, kag tawhanon nga kinamatarung, samtang ang iya kabuhi, ang iya pagbalik sa Pilipinas, kag ang iya kamatayon sang Agosto 21, 1983, nagapabilin nga importante nga bahin sang kasaysayan sang Pilipinas.
