Padayon ang aktibidad ni Pangulong Ferdinand Marcos Jr. subong nga adlaw sang Lunes sa tunag sang naeksperyensyahan nga epekto sang Bagyo Pepito sa pungsod.
Pagapangunahan sang pangulo ang ika-49 nga National Prayer Breakfast sa Malacañang subong nga aga.
Ang Philippine National Prayer Breakfast ang ginlunsyar sadtong 1975 nanday anay Senate President Gil Puyat kag Atty. Francisco Ortigas Jr.
Sa pagtilipon nga ini nagaulupdanay ang mga lider sang gobyerno, business sector, kag nagkalain-lain nga relihiyon agud magpangyo sang giya sa Ginoong Diyos para sa pungsod.
Magasugod ang programa alas-8:00 sang aga, nga pagatambungan man nanday Executive Sec. Lucas Bersamin, Philippine National Prayer Breakfast Foundation Inc. Spiritual Adviser kag Retired Chief Justice Reynato Puno, PNPB Foundation Inc. Chairman Bishop Justice Raoul Victorino, PNPB Foundation Inc. President Jose Villanueva, kag iban pa nga opisyal, obispo, kag pastor.
