ROXAS CITY – Ginkasubo sang alkalde sang banwa sang Jamindan ang pagpositibo sang isa naman nila ka residente sa Coronavirus Disease ukon COVID-19.
Ini ang ginpahayag ni Mayor Mac Arthur Valdemar sang mainterview sang Bombo Radyo Roxas.
Suno kay Valdemar nga nag-abot sa probinsya sang Capiz ang 47-anyos nga Locally Stranded Individual ukon LSI sadtong Hunyo 27 kaupod man ang iya pamilya gikan sa Quezon City, Metro Manila kag lunsay mga residente sang Barangay Lucero sang amo nga banwa.
Bangud diri, gilayon sila ginpaidalom sa 14 day strict home quarantine sa ila barangay kag ginpaidalom sa Rapid Test apang nag negatibo ang ila tanan nga resulta.
Magluwas sa Rapid Test ginpaidalom man ini sa RT-PCR Test kun sa diin 21 ka-adlaw pa ang ila ginhulat antes nag-abot ang iya resulta sang Hulyo 19.
Nahibaluan nga asymptomatic ang nasambit nga LSI kag nagapabilin sa gihapon nga naka-home quarantine.
Padayon naman ang ginapatigayon nga contact tracing sang lokal nga gobyerno sang Jamindan agud matumod ang mga indibidwal nga nakasalamuha sini lakip na ang iya mga himata.
Samtang, nagpanugyan naman ang nasambit nga alkalde sa mga residente nga kun mahimo indi na lang anay magguwa sa ila balay kun wala man lang sang importante nga kadtuan.
Dugang pa ni Valdemar nga importante ang kooperasyon sang tanan agud indi na madugangan ang kaso sang COVID-19 sa ila banwa.
Sa karon, yara na sa anom ang kabug-usan nga numero sang napagkit nga kaso sang nasambit nga balatian sa Jamindan.
