Ginsumiter na sang mga piskal sang International Criminal Court (ICC) ang ika-anum nga batch sang ebidensya sa kaso nga crimes against humanity batuk kay anay Presidente Rodrigo Duterte.
Kabahin ini sang pre-trial proceedings sa kaso sang anay Presidente may kaangtanan sa ginaalegar pagpamatay sa idalum sang maduguon nga giyera kontra droga sang iya administrasyon.
May kabug-usan nga 267 ka mga butang ang ginsumiter sang piskalya halin sang nagsugod ang pagbuyagyag sang ebidensya sang Abril 30 kag makaduha man sila ka beses nga naghingyo sang pagpalawig sang stipulated submission sang nasambit nga mga dokumento nga gin-aprubahan sang ICC.
Ang tanan nga mga materyales nga isumiter mangin kabahin sang mga ebidensya nga pagagamiton sang piskalya sa confirmation hearing sang kaso sang anay Presidente nga natalana nga hiwaton sa Setyembre 23, sang subong nga tuig.
Sa natalana nga hearing, hibaluon kun may yara sang bastante nga ebidensya agud mapadayon ang pagbista kag kun makumpirmar ang akusasyon batuk sa anay Presidente, magapangatubang sang full trial sa ICC si Duterte.
