ROXAS CITY – Nagpaidalum na sa self quarantine sa ila tagsa ka mga balay ang duha sa tatlo ka mga seafarer nga nakalusot sa border security checkpoint sang mga kapulisan.
Ginkumpirma sang City Disaster Risk Reduction and Management Officer (CDRRMO) Dennis Saneo nga ila na natigayon nga malab-ot ang ikaduha ng seafarer nga kalakip sa nag-abot sang nagligad nga gab-i sa syudad sang Roxas matapos nakasakay sa Roro bus padulong sa Dumangas port tobtob nag-commute pauli sa Roxas City.
Nagpakig-angut naman sila sa Barangay Health Emergency Response Team (BHERT) sang barangay nga amo ang maga-monitor adlaw adlaw sa sitwasyon sang amo nga seafarer nga ginakabig na Person Under Monitoring (PUM).
Gindula ni Saneo ang pagkabalaka sang mga pumuluyo sa amo nga barangay, bangud suno diri nga pagasundon ang quarantine protocol nga 14 ka adlaw kag hugot nga i-monitor ang iya sitwasyon.
Kun sa sulod sang 14 diyas kag wala sang ginpakita nga sintomas sang COVID-19 ang amo nga seafarer, makunsidera ini nga hilway na sa amo nga balatian.
Daku man ang pagpasalamat ni Saneo bangud nakita sini ang willingness sang amo nga seaman nga mag-home quarantine sa diin nagpasalig ini nga pagasundon ang tanan nga pagsulundan.
