Ginpanindugan sang grupo sang Karapatan nga ang kaundan sang ika-lima nga State of the Nation Address (SONA) ni Presidente Ferdinand Marcos Jr., daw wala gid nagbag-o, kag nagapabilin nga kulang ang mga sabat sang administrasyon sa mga mayor nga problema nga ginaatubang sang pungsod.
Sa interview sang Bombo Radyo kay Raoul Manuel, National Council Member sang Karapatan, iya ginpahayag nga cursory lang ang paghinun-anon sang Presidente sa pila ka mga importante nga isyu nga suno sa iya dapat hatagan sang dugang nga atensyon.
Suno kay Manuel, indi bastante ang short-term solutions kag kinahanglan ang konkreto, long-term, kag makahulugan nga mga tikang agud masabat ang mga problema nga gina-atubang sang mga pumuluyo.
Nagpabutyag man sang kabalaka ang grupo sa suporta sang administrasyon para sa Pax Silica, isa ka industrial and technology hub plan nga nagatuyo sa pagpabaskog sang papel sang Pilipinas sa pangkalibutanon nga artificial intelligence kag semiconductor supply chain.
Pahayag pa niya, ang proyekto mahimo nga magbutang sa katalagman sang pungsod, samtang ang Malacañang kag iban pa nga mga opisyales sang gobyerno nag-insister nga ini pagahimuon suno sa kasuguan, nga may proteksyon sa palibot, kag wala ginasakripisyo ang pungsodnon nga interes kag soberanya.
Nagalaum ang grupo nga matuman sang administrasyon ang mga promisa sini sa SONA. Ginsiling sini nga importante nga makita sang publiko ang konkreto nga pagpatuman sang mga programa kag indi lamang ang mga promisa nga nagapabilin sa mga speech.
