Sa ikatlo nga adlaw sang confirmation of charges hearing sa International Criminal Court (ICC), ginpanindugan sang lead defense counsel nga si Atty. Nicolas Kaufman sa media sa imbukada sang iya statement nga gin-alegar biktima si Former President Duterte sang media sensationalism sa Pilipinas.
Sa iya pormal nga pag-atubang sa korte, ginpakamalaot sang lead defense counsel ni Duterte nga si Nicholas Kaufman ang paagi sang pagreport sang pila ka mga media sa pungsod.
Ginpahayag sini nga ang mga report ang nagatutok lamang sa mga kontrobersyal ukon makakulugmat nga bahin sang mga pahayag sang anay presidente.
Suno kay Kaufman, ang ini nga sahi sang pagreport ang wala nagapakita sang bug-os nga konteksto sang mga pahayag ni Duterte, nga ginagamit subong batuk sa iya sa hearing.
Sa pagpadayon sang session, gin-insister sang lead legal counsel ni FPRRD nga si Atty. Nicholas Kaufman nga inosente si Duterte sa mga kaso batok sa iya nga naangot sa drug war.
Suno kay Kaufman, wala sang klaro kag matuod nga ebidensya ang prosekusyon para suportahan ang alegasyon nga nakakomiter si Duterte sang crimes against humanity.
Dugang pa sini, wala sang “smoking gun” sa kaso kag ginlaragway niya bilang “desperate attempt” ang pagpangita sang ebidensya sang prosekusyon.
Pahayag pa niya, ang mga videos nga ginpresentar sang prosekusyon, puro lamang ginaalegar pagpamahog ang gin-highlight kag wala sang aktwal nga ebidensya nga may direkta nga mando si Duterte nga magpatay.
Ginpanindugan man niya nga wala bisan isa sa mga testigo nga may kaangtanan sa 49 ka insidente ang makapamatuod nga nakabaton sila sang direkta nga sugo halin sa anay presidente.
Sa ikaduha nga session, ginsaysay ni Atty. Kaufman nga ang “neutralization” ang wala direkta nagatumod sa pagpatay, kundi suno sa iya isa ka “lawful incapacitation through arrests and related measures.”
Suno sa iya, nakabase ini sa police manuals, public clarifications sang police leadership, posisyon sang estado sa pinakamataas nga korte sa Pilipinas, kag mangin sa testimonya sang mga witness nga ginpresentar mismo sang prosekusyon.
Pahayag pa niya, nagapakita man ini sang isa ka klaro kag consistent nga paghangop nga ang “neutralization” nagatumod sa legal nga pagdakop kag iban pa nga legal nga tikang — indi sa polisa sang pagpatay.
Dugang pa ni Kaufman nga kun ang alegasyon sang prosekusyon kabahin sa “common plan” nga naangot sa Command Circular No. 16 of 2016, nga para sa iya, mapaslawan ang kaso batok kay Rodrigo Duterte.
Sa katapusan sang iya presentasyon, ginpahayag niya nga kun amo sina ang basehan sang prosekusyon, mas pillion nalang sini nga magpauli bangod sa iya panan-awan, indi gid guilty si Duterte sa mga kaso nga ginpasaka batok sa iya.
Antes magtakop ang session 2, ginpamangkot sang legal counsel ni Former President Rodrigo Duterte ang International Criminal Court (ICC) prosecution kon may plano man sila nga imbestigahan ang administrasyon ni President Ferdinand Marcos Jr., samtang nagapanindugan nga magapadayon ang ginapahayag “vigilante killings” bisan pa nga natapos na ang termino sang anay Presidente.
Suno kay Kaufman, nagaguwa sa report gikan sa Dahas Project sang University of the Philippines nga 160 sa 342 ka mga pagpamatay ang narekord sa kamot sang state agents sa una nga tuig sang administrasyon ni Marcos.
Ginpanindugan ni Nicholas Kaufman nga ang pagdakop kay Rodrigo Duterte kag ang pagdul-ong sini sa The Hague ang wala nakaapekto sa nagapadayon nga kaso sang pagpamatay nga ginhimo sang mga states forces ukon vigilante groups.
Bangud sini, namangkot si kaufman kun may yara bala sang ginahimu nga imbestigasyon ang prosekusyon sang International Criminal Court angut sa nagapadayon nga mga insidente.
Ini ang katapusan nga bahin sang presentasyon ni Kaufman antes nagtakop ang Session 2 sa Day 3 sang confirmation of charges hearing ni Duterte antes magsugod sa katapusan nga session.
Antes nagsugod ang katapusan nga session sang confirmation of charges hearing sa International Criminal Court Pre-Trial Chamber I, nagpahanumdom si Presiding Judge Iulia Antoanella Motoc sa tanan nga partido kag participants nga siguraduhon nga indi mawaragwag ang confidential information sa ila submissions.
Tuyo sini agud nga malikawan ang kinahanglan sang closed sessions. Ginpahamtang man nga ang redactions sa transcript kag sa direct broadcast limitado lang sa identifying information para maprotektahan ang mga testigo kag biktima, samtang nagapadayon gihapon ang transparency.
Sa third and final session, padayon si Nicholas Kaufman sa pagpresentar sang ebidensya bilang depensa kay Former President Duterte.
Nahibaluan nga subong nga adlaw, ang katapusan sang confirmation of charges Hearing kon sa diin magapadayon ang submission of merits kag closing statements sang prosecution, legal representatives sang drug war victims, kag defense legal counsel ni Duterte.
