Nahingagaw antes magtakop ang tuig 2024 ang ikatatlo nga impeachment nga gin-file sang Huwebes sa Kamara batuk kay Vice President Sara Duterte.
Ini duwa ka adlaw antes ang holiday break sang Kongreso kaangut sang pagsaulog sang Paskwa kun sa diin nakatalana nga magbalik liwat ang sesyon sa Enero.
Ang ikatatlo nga reklamo batuk kay VP Sara ang gin-file sa talatapan ni House Secretary General Reginald Velasco sang grupo ni Atty. Amando Ligutan, mga kaupdanan sini sa religious groups kag koalisyon sang mga pari nga gin-akusaran si VP Sara sang culpable violation of the Constitution, betrayal of public trust, plunder and/or malversation, bribery, graft and corruption kag iban pa.
Ang 70 ka panid sang reklamo ang may kaangtanan sa ginaalegar indi insakto nga paggastos sang P612.5 million nga confidential funds sa Office of the Vice President (OVP) kag DepEd sa tion sang pagdumala ni VP Sara halin sang ulihi nga quarter sang 2022 tubtob ikatatlo nga quarter sang 2023.
Ang kaso ang nag-ugat sa imbestigasyon nga ginpatigayon sang House Committee on Good Government and Public Accountability.
Gin-indorso naman ni Camarines Sur 3rd District Rep. Gabriel Bordado Jr., Deputy Minority Leader kag AAMBIS-OWA Partylist Rep. Lex Anthony Cris Colada ang impeachment.
Suno kay Ligutan, 12 nga mga pari, miyembro sang clergy, abogado kag mga miyembro sang non-government organizations ang nagpirma sa reklamo.
