ROXAS CITY – Natigayon nga maaresto ang ikatatlo nga suspek nga 28-anyos nga tricycle driver nga imbolbado sa pagluthang patay sa biktima nga si Retired Master Sergeant Joniffer Borda sa Barangay Bolo, Roxas City.
Pinaagi sa gintingub nga pwersa sang Roxas City Police Station kag Estancia Municipal Police Station, naaresto ang suspek nga si Ian Abagatnan sang Purok 1, Barangay Tacbuyan, Estancia, Iloilo.
Suno kay Police Major Rene Obregon, Chief of Police sang Estancia PNP nga takna alas 11:50 kagab-i sang madinalag-on nga nadakpan ang suspek sa ginkasa nga Hot Pursuit Operation sang mga katapo sang Estancia PNP rason nga gilayon nila ini ginpalab-ot sa mga kapulisan sang Roxas City Police Station.
Ginpahayag sini nga posible wala pa makahibalo ang suspek nga nadakpan na ang duha ka mga kaupdanan sini rason nga wala ini makapanago.
Narekober sa suspek ang masobra P9,000 nga ginapatihan parte sini sa pag hold-up sa biktima.
Ginakabig naman ni Police Lieutenant Colonel Ricardo Jomuad Jr., nga isa ka daku nga accomplishment ang pag-aresto sa tatlo ka mga suspek.
Natalana naman nga pasakaan sang kaso nga Robbery with Homicide ang tatlo ka mga nasambit nga suspek.
Ginpasalamatan man ni Jomuad ang mga katapo sang Estancia PNP bangud sa madasig kag madinalag-on nga hot pursuit operation.
Samtang, nagapadayon sa gihapon ang ginakasa nga hot pusuit operation sa ikaapat nga suspek nga imbolbado man sa pagluthang patay kay Borda.
