ROXAS CITY – Nadiskubrehan kag nadakpan sa akto sang Municipal Environment and Natural Resources Office (MENRO)-Sigma ang pagpatigayon sang iligal nga operasyon sang quarry sa Sitio Sinamongan Barangay Bangon-bangon banwa sang Sigma kagab-I.
Ini ang ginpahayag ni Ernesto Gicalde, Environmental Management Specialist II sang MENRO-Sigma sang mainterview sang Bombo Radyo.
Suno diri, gilayon nga nagpatigayon sang surveillance ang MENRO matapos nga makabaton sang impormasyon nga may yara sang nagahiwat nga iligal nga operasyon sa nasambit nga lugar kun sa diin pagkagab-i ginkasa ang pagdakup apang nakapalagyo ang mga wala pa matumod nga persona kag nabilin ang isa ka backhoe.
Nakit-an sa sulod sang backhoe ang logbook kag ginapahayag ginapanag-iyahan ini ni Erwin Andrada.
Ginkumpirmar man ni Gicalde nga wala sang special permit ang nasambit nga quarry sites gikan sa CAPENRO kag makabig nga bayolasyon sa Executive Order nga ginpapanaug ni Governor Fredenil “Oto” Castro.
Mahibaluan nga yara sa kapin isa ka ektarya na ang nakabkab sa amu nga sites kag indi pa matul-id kun ano ang kadalumon.
Nagapanawagan naman si Gicalde sa mga pumuluyo, nga indi magkahadlok maghatag sang impormasyon ilabi na sa mga nagapatigayon sang iligal nga operasyon sa quarry.
Sa karon, iga-turnover ang nakuha nga salakyan sa paghinakop sang CAPENRO para sa nagakaigo nga disposisyon.
