Magabaligya man ang lokal nga gobyerno sang syudad sang Iligan sang bugas sa balor nga ₱20 kada kilo sa bulan sang Hulyo bilang kabahin sang “Bente Bigas, Meron Na!” programa sang gobyerno.
Kasunod ini sang amo man nga praktis nga ginasunod sang iban pa nga LGUs sa pila ka bahin sang Mindanao.
Suno kay Iligan City Agriculturist Mary Ann Beley, nakabaton na sila sang mandu gikan sa pamunuan sang Department of Agriculture nga sugdan ang programa sa syudad.
Ginsiling sini nga ang bugas ang magahalin sa bodega sang National Food Authority kun sa diin ginhatagan sila sang una nga alokasyon sang bugas nga nagalab-ot sa 10,000 ka kilo.
Samtang ang lokal nga gobyerno sang Iligan ang magabaton sang ₱6.50 nga subsidy halin sa ₱26.50 kada kilo nga presyo nga ila baklon sa NFA.
Ang programa magahatag sang prayoridad sa mga vulnerable nga sektor kaangay sang mga senior citizens kag mga may kasablagan sa lawas.
Ang ila nga alokasyon para sa mga konsumidor magalab-ot sa lima ka kilo kada tawo.
Kon madumduman, una nga ginlunsar sang gobyerno ang P20.00 kada kilo sang bugas sa Visayas kag pila ka bahin sang Luzon bilang kabahin sang promisa sang PBBM.
