ROXAS CITY – Nakahunong na sa karsel sang Roxas Component City Police Station ang 52-anyos nga lalaki matapos nga akto nadakpan sa pagpangawat sang ilimnon sa isa ka restaurant sa Barangay Baybay, sini nga syudad.
Ginkilala ang suspek kay Nicacio Sevilla, kag residente sang Sitio Lawis, sa amu man nga barangay.
Sandig sa inisyal nga imbestigasyon ni PSSg. Gamin Unarce, samtang nagakatulog ang wala na ginhingadlan nga barista kag upod sini sa sulod sang amu nga kalan-an, nakabugtaw ang mga ini sa gahod kag kalas, sa ila pagtsekyar, akto nila nga nakit-an ang suspek nga ginakuha ang duha ka ilimnon.
Gilayon nga ginsinggitan sang mga ini kag ginguwa, kag hinali nga nagdalagan ang suspek apang nadusmo ini rason nga nadakpan siya kag ginhigot agud indi makapalagyo samtang nagtawag sang mga kapulisan.
Nag-angkon ang suspek sang gasgas sa iya tuhod kag siko nga gindapatan man sang pagbulong.
Nahibaluan nga madamo na nga beses nga nagakadula ang mga baligya sang amu nga resto, apang wala nila naaktuhan ang makawat, gani desidido ang tag-iya nga magpasaka sang panumbungon batuk sa suspek.
