PANAY, CAPIZ – Ginapahalin na sang Local Government Unit (LGU) sang Panay ang mga residente nga kwestiyonable ang pag istar kag illegal nga nakakuha sang balay sa Panay Housing.
Sa interview sang Bombo Radyo kay Nanay Gina, ginpadalhan sila sang letter sang July 22 nga ginahatagan nalang ini sang tinion nga makahimos kag makabiya sa ila balay subong nga adlaw.
Suno pa diri nga natingala sila nga naghambal ang munisipyo nga illegal occupant sila apisar nga may ara ini sang mga dokumento nga ginauyatan nga pirmado sang anay alkalde nga si Felipe Barredo kag taga National Housing Authority.
Nanindugan naman si Nanay Gina nga indi sila maghalin sa amo nga unit kay nagapati ini nga wala sang bayolasyon nga nahimo.
Mahibaluan nga 13 ka mga units ang ila nga bawion nagikan sa mga residente nga ilegal nga nagaistar sa nasambit nga lugar.
