ROXAS CITY – Arestado sang mga operatiba sang Criminal Investigation and Detection Group (CIDG) Olongapo kag Zambales FielD Units ang kontrobersiyal nga Korean national kag kahagugma sini bangud sa kaso nga illegal recruitment kag human trafficking.
Yara karon sa kostodiya sang Olongapo CIDG ang koreano nga si Kim Tae Hyoung kag kahagugma nga si Cynthia Raboy, matapos nagpatigayon sang operasyon ang mga otoridad bangud sa madamo nga reklamo nga ginapalab-ot sang Castillejos Municipal Police Station angut sa pagpangrecruit ni Hyoung sa mga luyag magtrabaho sa South Korea nga naka-graduate sa Korean language school.
Ginaalegar nga nagapakilala si Hyoung nga representante sang Hyundai South Korea nga nagapangita sang mga Filipino workers nga luyag magtrabaho sa ila pungsod.
Apang ginpahayag nga ginapangayuan sila ni Hyoung sang P40,000 bilang placement fee nga natigayon na nga mabayaran sang mga naga-aspirar nga makatrabaho sa luwas sang pungsod agud mabutong sa kapigaduhon ang ila pamilya.
Natigayon nga madakpan si Hyoung kag ang nobya sini pinaagi sa entrapment operation.
Nahibaluan nga kapin sa 200 ka mga indibidwal ang natigayon man nga matuntuhan ni Hyoung kaupod ang sadto nobya sini nga isa ka Capiezeña nga si Ramilyn Andrade.
Nabuyagyag lamang ang ginhimo nga illegal recruitment sang duha sa kapin 200 ka mga indibidwal nga ila nakuhaan sang daku nga kantidad bilang placement fee matapos ginkatingala sang mga biktima nga indi na nila makontak sanday Andrade kag Hyoung sa ginpromesa nga adlaw sang ila nga flight.
Photo Credits to CIDG-Olongapo
