Nag-file sang formal complaint ang coalition sang mga doctor, health advocates , mga abogado kag myembro sang Philippine Health Insurance Corporation (PhilHealth) sa Office of the Ombudsman bangud sa ginaalegar illegal transfer sang PhilHealth reserve funds sa National Treasury.
Sa interview sang Bombo Radyo kay Atty. Rodel Taton, Dean sang Graduate School of Law sang San Sebastian College-Recoletos Manila, iya ginpahayag nga ang reklamo nga ila ginahingyo sa Office of the Ombudsman amo ang pagpatuman sang preliminary investigation kag pagdetermina sang possible criminal, civil kag administrative liability, lakip na ang technical malversation, paglapas sa Anti-Graft and Corrupt Practices Act, plunder, kag grave misconduct.
Ang reklamo ang nahanungod sa pag-transfer sang P60 billion halin sa PhilHealth reserves sandig sa Department of Finance Circular No. 003-2004, nga nagamandu sang remittance sang ginatawag “excess” funds agud mapondohan ang unprogrammed appropriations sa idalom sang Republic Act No. 11975, ukon ang 2024 General Appropriations Act.
Suno kay Atty. Taton, ang reklamo ang nagatumod sang paglapas sa Republic Act No. 7875 nga nagasiling nga ang PhilHealth reserve funds ang dapat nga i-invest ukon gamiton agud ma-improve ang benepisyo kag mabuhinan ang kontribusyon sang mga myembro kag ang Republic Act No. 11223 ukon Universal Health Care Act, nga nagadumili sa pag-transfer sang ano man nga PhilHealth reserve funds ukon income sa National Government.
Pahayag pa niya, ang pag-transfer sang pondo ang nagtuga sang negatibo nga epekto sa PhilHealth kag mga myembro sini lakip na ang ginabanta kadulaan sang interest income nga nagalapaw sang P50 million nga mahimo pa kuntani nga magamit agud mapasangkad ang benepisyo kag mahagan-hagan ang kontribusyon sang myembro.
Nahibaluan nga ang mga respondents amo sanday Executive Secretary kag former Department of Finance Secretary Ralph Recto kag former PhilHealth President kag Chief Executive Officer Emmanuel Ledesma Jr.
