Nagtakop na ang karera sang Ilonggo veteran playmaker nga si Kiefer Ravena para sa Gilas Pilipinas matapos nga nagretiro na siya sa national team.
Suno kay Ravena, nalipay siya sa iya madugay nga pag-alagad sa Gilas, halin pa sang 2009 sang nag-upod siya sa youth team tubtob nga nakalab-ot sa senior team.
Pahayag niya, tapos na ang iya karera sa national team kag madamo siya sang maayo nga handumanan.
Ang ulihi nga pag-upod ni Ravena para sa Gilas amo sang 2023 FIBA World Cup nga ginhiwat sa Manila.
Sa sulod sang iya karera sa national team, nakadaog man siya sang lima ka bulawan nga medalya sa Southeast Asian Games halin 2011 tubtob 2019. Nakakuha man siya sang bulawan nga medalya sa SEABA sa under-18 kag senior categories.
Sang nagbag-o ang direksyon sang Gilas pagkatapos sang 2023 FIBA World Cup kag si Tim Cone ang nagkuha sang posisyon bilang head coach, wala na si Ravena nalakip sa lineup ukon training pool sang national team.
Apisar may mga tagasuporta nga nagapanawagan nga ibalik siya sa Gilas agud makabulig sa mga mas bata nga manughampang, nagpahayag si Ravena nga nag-abot na ang tion agud ihatag ang oportunidad sa bag-o nga henerasyon sang mga atleta.
