ROXAS CITY -Ginpanginwala sang 41-anyos nga ginang ang alegasyon nga ginabugaw sini ang 11-anyos nga anak sa iya kaugalingon nga kumpare sa isa ka barangay sa probinsiya.
Ini kasunod sa nagalagaw nga alegasyon nga ginabugaw sini ang anak kabaylo sang P20 tubtob P50.
Sa esklusibo nga interview sang Bombo Radyo, emosyonal nga ginpanginwala ni nanay Josephine ang alegasyon batuk sa iya.
Suno sa ginang nga posible ginhatagan malisya sang mga kaingod balay ang masami paghatag sang P20 sang kumpare sini nga si Alyas Julio sa anak sini nga si alyas Jane sa tion nga mag-inom sa ila balay.
Gin-athag sang ginang nga tanan nga mga kabataan sini ang ginahatagan man sang kwarta ni alyas Julio apang aminado nga mas ginahatagan sini sang dagko nga kantidad si alyas jane.
Posible suno sa inang nga masami ginahatagan sang iya kumpare sang kuwarta ang dalagaita bangud ihada ini ni Alyas Julio.
Samtang wala sang ideya ang ginang sa nagalapta nga alegasyon sa pihak nga matunog na ini sa ila nga lugar.
Sa karun gina-imbestigaran na sang Women and Children Protection Desk sang Roxas City Police Station ang kaso ni alyas Jane.
