ROXAS CITY – “God’s plans and timing is always the best!”
Ini ang ginpahayag ni Mr. Michael Angelo Mendoza matapos ginsaysay ang mga naagyan sini antes nakapasar kag nangin Top 4 sa June 2024 Philippine Nurses Special Professional Licensure Examination.
Sa interview sang Bombo Radyo kay Mr. Mendoza, gintuad sini nga indi nangin madali ang iya mga naagyan antes nakapasar sa nasambit nga pasinawan.
Suno kay Mendoza nga apisar kapoy ini sa iya ubra bilang isa ka OFW sa Riyadh, Saudi Arabia, gintinguhaan gid sini nga makabugtaw sang timprano adlaw-adlaw agud maka-catch up sa review online.
Ginpakigbahin pa sini nga may mga tion nga kun kaisa daw mahibi kag ma-give up na ini apang iya ginapaminsar ang rason kun ngaa nagkuha siya sang exam.
Ginpahayag sini nga nangin kabakod kag inspirasyon gid sini sa pagkuha sang licensure examination amu ang iya iloy nga may balatian sa heart kag ang iya amay nga nagtaliwan sang 2021.
Nahibaluan nga una ini nga kahigayunan nga pagkuha sang licensure examination ni Mendoza matapos nag-graduate 13 ka tuig na ang nakaligad.
Si Mendoza ang nagtapos sang Bachelor of Science in Nursing sang 2011 sa Filamer Christian University.
Nangin Rank 4 si Mendoza sa SPLE kag nakakuha sang 85.40% nga rating.
Isa si Mendoza sa 1,156 nga nakapasar gikan sa 1,806 nga examinees nga nagkuha sa nasambit nga pasinawan.
