ROXAS CITY – Nagapanawagan sa Local Government Unit (LGU) – Tapaz ang iloy sang ginapahayag miyembro sang Communist Terrorist Group (CTG) nga buligan sila mapauli ang bangkay sang iya bata nga napatay bangud sa engkwentro nga nagluntad sa tunga sang rebelde nga grupo kag grupo sang militar sa Sitio Inuran, Barangay Dalagsaan, Libacao, Aklan sang Mayo 14, 2023.
Sa eksklusibo nga interview sang Bombo Radyo kay ‘Vilma’, aminado ini nga nag-upod sa hublag ang iya 23-anyos nga bata nga si ‘Aldrin’ kag humalin sadto wala na ini sang komunikasyon sa ila sa sulod sang 5 na katuig.
Gani, ginkakibot sini ang nabaton nga sulat nagikan kay Ka Dayan nga nagapahibalo nga napatay sa engkwentro ang iya bata samtang nagapakigbato sa grupo sang rebelde.
Wala man sini nalikawan nga maghibi bangud sa kasubo nga nadangatan sang iya bata nga ginapahayag ginbilin kag ginpabay-an lang sa bukid matapos ang engkwentro.
Suno sa iloy, bisan tul-an na lang sang iya bata luyag sini mapauli sa ila lugar agud mahatagan sang maayo nga paglubong.
Sa karon, nakig-angut na ang LGU-Tapaz sa Philippine Army kag Philippine National Police Aklan agud pangitaon ang bangkay sang napatay nga NPA.
