May tuyo nga taguon sang 21-anyos nga iloy ang pagpatay sini sa bag-o bun-ag nga lapsag nga ginsulod sa eco bag kag gintago sa sulod sang cabinet.
Ini ang nagaguha sa imbestigasyon sang mga kapulisan sa syudad sang Roxas may kaangtanan sa napatay nga lapsag nga lalaki nga ginkuga sang kaugalingon nga iloy nga gintago sa pangalan nga alyas Lyn, residente sang isa ka banwa sa premier distrito sang probinsiya sang Capiz, apang nagatrabaho bilang caregiver sa sulod sang lima ka bulan sa isa ka pamilya sa Barangay Baybay, Roxas City.
Ginpahayag ni Police Master Sergeant Ronnie Recto, imbestigador sang Roxas City PNP nakalab-ot sa ila atensyon ang nasambit nga insedente matapos gintawagan sila sang Roxas Memorial Provicial Hospital kag gin-imporma nga may gindala nga patay nga lapsag.
Sa pagpangusisa sang kapulisan natukiban nga Septiembre 17, 2021 ginbun-ag ang lapsag, apang gintago ni alyas Lyn ang natabo sa iya pamilya mangin sa iya employer bangud ginapanindugan sini nga wala siya nagabusong.
Bangud sa pagduda sang iya employer, ila gindala sa ospital kag ginpaidalum sa pregnancy test kag ultrasound si Lyn sa diin nagaguha nga nagabusong ini apang ginkatingala nga wala ang bata.
Suno pa kay Recto sang napakig-angutan sini si Lyn, gintuad sa iya nga patay na ang bata sang nagguha sa iya taguangkan.
Apang agud masiguro ang kamatuoran sa ginpahayag ni Lyn, ginpaidalum ang bangkay sang lapsag sa post mortem examination kag nagguha nga napatay ini bangud sa asphyxiation by strangulation ukon pagkuga.
Nagapabilin sa karon sa ospital si Lyn, apang napasaka na sang kapulisan ang kaso nga infanticide pinaagi sa inquest proceeding.
Samtang gintugyan sa pamilya ni alyas Lyn ang bangkay sang lapsag sa diin didto ini igalubong sa lugar sang iya iloy.
