ROXAS CITY – Ginhimo nga isa ka insipirasyon sang estudyante nga naggradwar bilang Summa Cumlaude sa West Visayas State University, ang iya iloy nga isa ka Overseas Filipino Worker (OFW) sa Japan.
Sa interview sang Bombo Radyo kay Mr. Jeno D. Bellido, indi academic ang iya focus sa pag-eskwela kundi ang makagradwar lamang kag mabuligan ang iya pamilya ilabi na ang iya iloy nga nagatrabaho sa luwas sang pungsod.
Suno kay Bellido nga bilang hinipo sa ila nga tatlo ka mag-ulutod indi madula nga makabatyag sang pressure ilabi na kung dako ang pagpati kag pagsalig sang pamilya nga masarangan kuhaon kag lab-uton ang mga awards sa pag-eskwela.
Mahibaluan nga si Bellido 22-anyos kag tumandok sang Poblacion Ilaya, Maayon Capiz, ang sa karun nagatrabaho online bilang full-time software engineer sa Oslo, Norway apisar nga indi pa siya gradwar sa iya kurso nga Bachelor of Science in Computer Science (BSCS).
Ginpakigbahin man sini nga ang iya pag-eskwela sa WVSU bangud sa maayo nga mga feedback sang iya mga abyan kag nagatan-ay sang libre nga tuition fee kung sa diin ini ang nagtulod sa iya agud magpasimpalad nga mag-apply agud makabulig sa iya iloy.
Ang mapalayo sa pamilya ang isa sa makabig nga pagtilaw kay Bellido bangud diri nasukat kung paano mangin isa ka independent nga estudyante ilabi na nga tuman ka layo ang pagpangabuhi sa syudad.
Sa nagatakop lamang nga recognition ni Bellido ginpakigbahin sini ang pila niya nga mga nabaton nga awards kaangay sang;
*Most Outstanding CICT Graduate
*With Highest Distinction
*Gold Medal for Academic Excellence
*Dean’s Medal for Excellence in Academics
*Dean’s Medal for Excellence in Innovation
*Dean’s Medal for Proficiency (BS Computer Science – Artificial Intelligence)
*Philippine Society of Information Technology Educators (PSITE) *Award for Excellence in IT Education
*Most Outstanding Graduate (BS Computer Science)
* Most Outstanding Intern (BS Computer Science)
*BPI-DOST Innovation Awards 2023 (Top 10, National)
*Top 2 Most Outstanding Student in Technology on Western Visayas (Silver Awardee) kag Tech for Good Award (Western Visayas).
Bangud sini, dako ang pagpasalamat ni Bellido sa unibersidad, mga manunudlo, pamilya kag abyan nga naghatag sang bilog nga suporta kag bulig sa iya nga pag-eskwela.
Mensahe sini sa kaangay estudyante, nga sa tion makabatyag sang kakapoy, kasubo kag madulaan sang paglaum ipabilin nga magpahuway kag hatagan sang oras ang kaugalingon bangud nagapati ini nga kung makapahuway sang instakto ang pinsar mahimo mu nga mangin productive kag mahupos ang isa ka butang.
