ROXAS CITY – Nakabaton ang isa ka Iloy sang P4,000 nga kuwarta bilang educational assistance sa iya bata nga yara sa kolehiyo.
Sa exclusive interview sang Bombo Radyo kay Imelda Castillon, sang Brgy. Tiza, sini nga syudad, ginpahayag sini nga nagpasimpalad lang ini nga magpadulong sa Capiz Villareal Stadium, para sa nasambit nga ayuda.
Suno pa diri, isa ini sa mga nagdagsa sa venue sang Agosto 20, nga wala mahatagan, apang ginlista ang iya pangalan kag contact number sang DSWD staff, kag ginhatagan sang pormas.
Nagpa-online register man ini pagkasunod nga adlaw, matapos nabatian nga indi mag-akomodar ang DSWD kun indi maka-register pinaagi online.
Apang bangud wala ini sa gihapon sang may nabaton nga text ukon e-mail, nagpadulong ini kahapon nga adlaw sang Biyernes sa opisina sang SWAD Capiz, kag ginhambalan ini suno diri, nga testingan lang sini nga magkadto sa venue kag tsekyaron ang iya pangalan sa payroll.
Bangud sini, nagpasimpalad ini subong nga Sabado, nga magpila sa venue, kag natigayon nga makasulod sa gymnasium, tubtob nga nakita sini ang iya pangalan sa listahan kag nahatagan sang P4,000.
