ROXAS CITY – Patay ang 57-anyos nga Iloy matapos makuryente sa Barangay Tamulalud, Dumarao, Capiz.
Ginkilala ang biktima kay Angelica Lisbo kag residente sang nasambitan nga baranagay.
Suno sa imbestigasyon sang katapo sang Dumarao Municipal Police Station, nakit-an na lamang sang bata sang biktima nga nagakaya na ang iya Iloy kag wala na sang kabuhi samtang nagakapot sang radyo.
Nahibaluan nga nagapamati sang radyo ang biktima kag ginpahayag nga gintsekyar niya ini matapos nga nagburot, samtang nakasaksak sa kuryente.
Ginpandangat pa sa Senator Gerardo M. Roxas Memorial District Hospital, sa banwa sang Dao ang biktima apang, gindeklarar ini nga dead on arrival sang doktor.
Sa karun, yara na sa isa ka punerarya sa nasambit nga banwa ang bangkay sang biktima.
