ROXAS CITY – Tuman ang pagpasalamat sang iloy ni Prince Dave Doncillo, ang estudyante nga gindakup sa ginpatigayon nga drug buy bust operation sang Regional Drug Enforcement Unit (RDEU) sa Sitio Bliss, Barangay Cagay, Roxas City matapos nga nahilway na sa karsel ang iya anak.
Sa interview sang Bombo Radyo kay Mrs. Rosevie Doncillo, ginpahayag sini nga kasubong nakuhaan sila sang tunok sa dughan sang na-released na sa presuhan si Prince Dave.
Ila na lamang ginapangamuyo nga ma-dismiss ang kaso sang iya anak agud dalayon na sila nga ma-kampante.
Ginkumpirma man sang ginang ang plano nga paghimo sang legal nga tikang agud mahatagan hustisya ang nadangatan sang iya anak nga gin-akusahan kag ginpreso nga wala sang sala.
Ginapanindugan ni Mrs. Doncillo nga inosente si Prince Dave sa ginapatuto nga akusasyon sa iya.
Suno sa ginang nga masami sini maabtan nga nagapatigayon sang bible study ang iya anak sa iban nga mga inmates sang yara pa sa presuhan.
Aminado ang iloy nga may gamay nga epekto kay Prince Dave ang pagka-preso sini, apang bangud sa ila pagsalig sa Ginoo, malampuwasan niya ini nga hitabo sa iya kabuhi.
NAhibaluan nga yara sa maayo nga sitwasyon si Prince Dave, matapos ini nga mahilway sa kostodiya sang Roxas City PNP apang agud bisan paano malimtan sini ang natabo sa iya, wala siya nagatenir sa Barangay Cagay kundi sa isa ka lugar kaupod ang iloy
