ROXAS CITY – Ginkumpirmar sang 42-anyos nga Iloy nga rabies ang ginkamatay sang iya 9-ka tuig nga bata nga lalaki sang tinalikdan nga adlaw sang Sabado, Marso 5.
Sa exclusive interview sang Bombo Radyo kay Rosie Jogerio, sang Sitio Nipa, Barangay Culasi, sini nga syudad, suno diri nga wala sila makahibalo nga ginkagat si alyas ‘Toto’ sang ginapatihan layaw nga ido sa People’s Park sa Brgy. Baybay kag nakaangkon sang samad sa iya kumalagko sa tiil.
Ulihi na nila nahibaluan sang ginsugid na sang biktima kag ginsiling sang doktor nga may rabies na sa lawas sang iya bata kag naglapta na ini sa iya ulo.
Nahibaluan nga Marso 2, sang nagsugod nga magtuhaw ang mga sintomas sang amu nga virus sa lawas sang biktima kaangay sang paglaway, mataas nga lagnat, nahadlok sa tubig kag indi mahim-os.
Aminado ang Iloy nga Biyernes sang hapon pa nila ginpadangat sa Roxas Memorial Provincial Hospital (RMPH) ang bata, apang bangud ginbalibaran sila kag iga-refer sa Iloilo City, nagdesisyon ang mag-asawa nga ibalik nila ang bata sa ila balay.
Sabado sang hapon, Marso 5, sang naglala’ ang ginbatyag sang bata kag nagdesider na ang Amay sini nga dal-on sa isa ka pribado nga ospital, apang mga pasado alas-9 sa gab-i, ginbawian sang kabuhi si alyas ‘Toto’ kag pagka-aga sang Domingo sang ginlubong ini.
Indi pa makapati ang nasambit nga Iloy sa gindangatan sang iya bata sa kadasigon sang iya pagtaliwan.
Sa karon, natigayon naman nga maturukan sang bakuna batuk sa rabies ang miyembro sang ila pamilya kag nakuhaan sang leksyon ang nasambit nga insidente.
