ROXAS CITY -Kasubong nga ginabasol sang iloy sang 18-anyos nga soltero nga naghikog ang anay nobya sang anak.
Wala napunggan ni Mrs. Yolindy Aducal iloy ni alyas Jan nga mangin emosyunal samtang ginpakigbahin sa Bombo Radyo ang ila nabatyagan matapos nga nakita ang nagabitay nga anak sa puno sang kahoy nga mangga.
Suno sa ginang nga gin-utas sang iya anak ang kaugalingon nga kabuhi, bangud sa tuman nga pagpalangga sa anay nobya
Ginkumpirma sang iloy nga sa anay karelasyon nagatiyog ang kabuhi sang iya anak.
Apang tuman nga nasakitan si alyas Jan sang ginbulagayan ini kag may yara sang bag-o nga nobyo ang ex GF nga ginbaylo sa iya.
Nagapati ang iloy nga tuman nga nasakitan ang anak sa diin bangud indi sini masarangan ang tuman nga sakit, nagdesisyon ini nga utason ang kaugalingon nga kabuhi.
Apang antes ini naghikog, nagbilin pa ini sang suicide note sa diin napagkit diri ang wala kamatayon nga pagpalangga sa babaye.
Nahibaluan nga desidido gid man nga magpanginmatay ang biktima, bangud gingapos pa sini sang paha ang duha ka mga tiil antes ginhigtan sang cable wire ang liog kag naglumpat sa puno sang mangga.
