ROXAS CITY – Naga-apelar sang bulig ang pamilya sang 30 anyos nga Capizeño OFW nga naaresto sa entrapment operation sa Kuwait.
Sa interview sang Bombo Radyo kay Carmen Bermejo, ginkakibot na lamang nila sang gintundaan sang ila nga himata nga gin-aresto sang mga kapulisan ang iya anak nga si Juvy Bermejo bangud gin-akusahan ini nga nagpangawat sang mga alahas sang iya employer nga babaye.
Nagapati si Carmen nga indi mahimo sang iya anak nga magpangawat kag posible nga ginplano sang iya employer nga babaye ang nasambit nga operasyon.
Ginpahayag sang ginang nga posible nagapangimon ang amo nga babaye ni Juvy bangud sa maayo sini nga relasyon sa iya amo nga lalaki.
Antes pa man naaresto ang anak, nagpanawag ini sa iya nga pamilya kag nagsugid nga ginsakit siya sang iya amo nga babaye.
Nahibaluan nga halos duha na ka tuig nga nagatrabaho sa nasambit nga pungsod si Juvy kag natalana na kuntani ini nga magpauli apang ginpa-extend sang iya nga amo ang iya kontrata.
May duha ka mga anak nga babaye ang nasambit nga OFW nga lunsay mga menor-de-edad.
