Ginkumpirmar mismo sang iloy sang isa ka Person with Disability (PWD) nga nadakpan matapos ginapahayag nagpangawat sa isa ka subdivision sa Barangay Lawaan, Roxas City nga madugay na nga nagapanguha-kuha ang iya bata sa ila barangay.
Sa interview sang Bombo Radyo kay Nanay Ging, ginsaysay sini nga wala man ini sila naga-untat nga maghambal kag maghatag sang laygay kaupod ang iya bana sa ila bata apang wala suno ini nagapamati kag nagabato pa ini sa ila.
Dugang pa sini nga nahuya nalang man ang mga ini bangud suki na ang ila bata sa mga ginareklamo sa barangay nga may kaangtanan sa pagpangawat.
Matandaan nga ginkilala ang nadakpan nga isa ka menor de edad nga lalaki, kag residente sang Sitio Pagutok, Barangay Milibili, sining syudad.
Natigayon nga nadakpan ang nasambit nga persona matapos nga natukiban sang isa ka gwardya sang subdivision nga may kalalakinhan nga nagapangawat sa isa ka stock house sa lugar kalakip ang amo nga PWD.
Madasig nga nagsakay sa motorsiklo kag nakapalagyo ang mga kaupod sini samtang ang amo nga PWD ang nabilin kag natigayon nga madakpan sang nasambit nga security guard nga may yara sang dala nga mga nanari-sari nga kabilya.
Sa karon, nagapabilin ini sa paghinakop sang Roxas City PNP para sa nagakaigo nga disposisyon.
