ROXAS CITY – Ginabasol sang iloy sang 16-anyos nga solterito nga napatay matapos ginbuntog sang cobra sa Barangay Bago, Roxas City ang naghatag sang amo nga sapat sa iya anak.
Wala napunggan ni Manang Grace nga mangin emosyunal sang mapakig-angutan sang Bombo Radyo bangud suno sa ginang nga wala madula sa ila si Pao kun wala lamang ginhatag ni Niño Garcia sang Jaro, Iloilo ang cobra.
Ginpanindugan sang ginang nga lipod sa ila ihibalo sang iya bana ang pagbaton sang cobra sang anak kag nakibot na lamang sang makita ini sa ila balay.
Makapila ka beses suno sa ginang nga ila ginpangabay ang anak nga ibalik na lamang ini sa tag-iya apang nagpakatig-a ini.
Wala man sila nagkulang sa pagpahanumdum sa solterito nga indi pagkaptan ang cobra bangud tuman ini ka delikado kag dalitan nga sahi sang sapat.
Apang may mga tion nga ila nakita nga ginakaptan sang iya anak ang cobra nga kasubong wala nahadluk.
Gin-athag pa sang ginang nga nalikawan kuntani ang pagkamatay sang ila anak kun ginkunsulta sila ni Garcia bangud propesyunal ini sa pag-atipan sa mga wild animals kasubong sang cobra apang si Pao ang wala sang tuman nga ihibalo pag-abot sa pag-atipan sa kasubong sini nga sapat.
Ginpanginwala man sini ang nagalapta nga report nga nagpanginmatay si Pao bangud sa problema nga ginapangatubang sini.
Suno sa iloy nga wala sang rason para utason sang iya anak ang kabuhi, bangud malipayon pa ini sang gab-I antes natabo ang pagbuntog sa iya sang cobra.
Samtang natigayon lamang makilala sang pamilya sang biktima si Garcia bangud sa impormasyon nga ginpalab-ot sa ila sang ka-grupo ni Pao .
Luyag man sang ginang nga pasabton si Garcia sa nangin liabilidad sini sa paghatag sang cobra kay Pao.
