Madinalag-on nga nabalik sa sulod sang Minor Basilica kag Pambansang Dambana ni Jesus Nazareno ang imahe kag andas subong nga adlaw.
Pila ka minuto antes mag alas onse sang aga, gilayon nga nakasulod sa simbahan sang Quiapo ang imahe sang Nazareno kag natapos ang Traslacion 2026.
Sa kasaysayan sang amo nga pagpatigayon sang prusisyon, subong nga tuig ini ang makabig nga pinakamahaba ukon pinakamadugay nga Traslacion.
Humalin sang nagsugod ini kahapon, Enero 9 sa Quirino Grandstand, nakaabot sa 30-ka oras kag 50-ka minuto antes nakabalik sa Simbahan.
Kung pagabasehan ang nagliligad nga rekord, nalabawan sini ang kadugayon sang 22-ka oras sang tuig 2012 kag 2017 rason nga ang pagbalik sang Poong Jesus Nazareno, ini gid labaw nga ginakalipay sang mga deboto nga mapisan nga naghulat sa simbahan.
Suno kay Rev. Fr. Robert Arellano, LRMS, ang Parochial Vicar sang Quiapo Church, isa sa mga rason sang kalawig sang Traslacion amo ang pagsaka sang mga deboto sa mismo nga andas bisan pa man sa madungay na nga pagpangabay sang simbahan sa ila nga indi magsaka kag ginadili ang pagsaka ukon paglukso.
Dugang pa niya, magluwas sa indi magpapugong ang mga deboto sa pagsaka sa andas, isa man sa nagapanguna nga rason kon ngaa nagdugay ang Traslacion amo ang pag-abot sang andas sa mga ruta nga ginsunod nga ang pila ka grupo, imbes nga itulodsa likod, ila pa gid ginsugata ang andas halin sa atubang, rason nga nabudlayan ini sa pagpadayon.
