PANITAN, CAPIZ – Blangko pa tubtob sa karon ang mga kapulisan sa pagkakilan-an sang duha ka mga suspek nga nagtiro-patay sa isa ka lalaki sa Poblacion Ilawod, Panitan, Capiz.
Sandig sa pagpangusisa sang mga kapulisan sa lugar, ginapatihan nga wala man sang kontra ang biktima nga si Hadjie Buñi nga residente man sang nasambit nga lugar nga posible mangin rason sa pagluthang-patay sa iya.
Sa dugang pa nga impormasyon nga drug surrenderee ini sang tuig 2016.
Matandaan nga nag-angkon sang mga igo sang pagpangtiro ang biktima sa likod, dughan, kamot kag tiil matapos ini nga ginpaulanan sang luthang kun sa diin narekober sang mga kapulisan ang siyam (9) ka mga empty shells sang calibre .45 nga armas luthang sa ginluntaran sang insidente.
Magaguwa kun tani ang biktima sa gate nila sang hinali ini nga gintiro sang duha ka mga suspek nga nagasuksok sang itom nga mga bayo kag may tabon ang mga itsura agud indi gilayon makilala.
